Toy Story 3

Toy Story 3 由未出.... 到出左
到出左成個月既今日先入場睇
真係等左好耐！
因為班細路都要睇
所以等等等

今日出左沙田UA睇11:25場
（咁都唔係早場價，要$65一個人）
沙田UA可能真係太老啦
個螢幕又細（真係好細！我諗係平時既一半咁大）
啲位又唔好坐（個位只係高到肩膀, 個人要訓落啲先舒服啲）
螢幕細但又做好多位（我坐係Row K, 係尾三Row... 但係感覺好遠！）

Toy Story 3 都算幾好睇
其實我好似一直都對佢唔係話好大期望
我由第一集都係麻麻地
不過班細路同啊妹都話想睇
又有人睇完話好睇
咁都係會入場睇下！

班玩具去到面對死亡既時候真係好感人
個果part真係做得好好！
其實我每次睇卡通既時候都會諗到一啲人生既問題
好似今次咁
我會想起我屋企既玩具公仔
諗起個啲我細個係香港帶去多倫多
之後又係加拿大帶回香港
陪住我有二十年既公仔
我從來都無諗過要唔要佢

不過宜家啲細路就唔同啦
眼見佢地啲公仔玩兩玩就唔要
又要媽咪買新野
其實宜樣野唔係只係細唔仔

有時候我覺得我地有時對爸媽都係咁
細個既時候就好鐘意爸媽，咩都同佢地分享
大個左，最好爸媽咩都唔好理
唔好煩我地，唔好問咁多野
我咁講唔係話我無做錯
其實上面講既我都有做
所以今日我坐係一個好愛佢爸媽既７歲小童身邊既時候
我想起自己細個同宜家既我

我... 掛住我爸爸媽媽...